Kaunting-kaunti na lang at makakaabot na si Zak sa venue ng kasal ng bestfriend niya at ng kanyang pinakamamahal nang may makasalubong siyang truck sa pagliko niya. Nang magmulat siya ay nasa isang paraiso na siya. Langit na ba iyon? Bilang patunay, may isang anghel na lumitaw sa harapan niya at nagwagwag pa ng mga pakpak nito.

“Am I dead?” wala sa sariling tanong niya.

“Hindi pa ito ang katapusan para sa iyo, nilalang. Nasa pagitan ka nang pagkabuhay at kamatayan, Zak. Pero bibigyan ka Niya ng pagkakataon na mabuhay kung magagawa mo ang misyon na iaatas Niya sa iyo. Gusto mo pa bang mabuhay, Zak?”

Sunud-sunod siyang napatango. “Kailangan ako ni Tiff. Nagmamakaawa ako. Kailangan ko pang mabuhay.”

Hinila pa siya ng anghel sa isang fountain na nasa gitna ng mala-paraisong hardin na iyon. Hinaplos ng kamay ng anghel ang ibabaw ng tubig. Isang babaeng nakasuot ng traje de boda ang umiiyak ang lumitaw roon.

“Siya ang iyong misyon, Zak. Siya si Irene Dimacuha. Nasa kanya ang susi upang magpatuloy ang iyong buhay. Kung magawa mong ibalik ang paniniwala niya sa pag-ibig, makakabalik ka sa mga mahal mo sa buhay.”

Ano ang magiging kahihinatnan ni Zak kung hindi niya magawa ang misyon na iniatang sa kanya? Magagawa niya kayang maibalik ang paniniwala ni Irene sa wagas na pag-ibig o siya ang mapapaibig ng dalaga?

Dalawang pusong umaamot ng pagmamahal… Isang hindi pangkaraniwang pag-iibigan…